दिपक श्रेष्ठ मण्डल
जनकपुरधाम । राष्ट्रिय स्वतन्त्र पार्टी (रास्वपा) धनुषाका  शीर्षस्थ नेता लक्ष्मेश्वर यादवले धनुषाका प्रहरी प्रमुख प्रहरी उपरीक्षक (एसपी) रूपेश खड्काको कार्यशैलीमाथि गम्भीर प्रश्न उठाउँदै एक साताभित्र सरुवा गर्न माग गरेका छन् ।

उनले प्रहरी प्रशासनमा दलाली, भ्रष्टाचार र घुसखोरी नियन्त्रण हुन नसकेको आरोप लगाउँदै एसपी खड्कालाई जिम्मेवारीबाट हटाउन सम्बन्धित निकायसँग माग गरेका हुन् ।

रास्वपाद्वारा आयोजित शुभकामना आदानप्रदान कार्यक्रममा बोल्दै  यादवले जिल्लामा सुशासन, पारदर्शिता र कानुनी शासन कायम गर्ने विषयमा प्रहरी प्रशासनको भूमिकामाथि प्रश्न उठाएका थिए ।

उनले प्रहरी प्रमुखको कार्यशैलीप्रति असन्तुष्टि व्यक्त गर्दै एसपी खड्काको सरुवाका लागि केन्द्रमा समेत जानकारी गराइसकेको दाबी गरे ।

यादवले मालपोत कार्यालय, सीमा क्षेत्र, सर्वसाधारणका दैनिक कामकाज तथा चेक बाउन्ससम्बन्धी विषयमा निष्पक्षता र कानुनी प्रक्रियाको प्रभावकारी कार्यान्वयन हुनुपर्नेमा जोड दिए ।

प्रहरी प्रशासनले नागरिकलाई निष्पक्ष सेवा प्रदान गर्नुपर्ने उल्लेख गर्दै उनले जिल्लामा देखिएका भनिएका अनियमिततामाथि गम्भीर ध्यान दिन सम्बन्धित निकायलाई आग्रह गरे।

एक साताभित्र निर्णय लिन माग

प्रहरी प्रशासनलाई थप जवाफदेही र पारदर्शी बनाउन एसपी खड्काको सरुवा आवश्यक रहेको यादवको भनाइ छ। उनले सम्बन्धित निकायले एक साताभित्र यस विषयमा निर्णय लिनुपर्ने मागसमेत अघि सारेका छन् ।

जिल्लामा शान्ति सुरक्षा कायम गर्ने, नागरिकका गुनासो सम्बोधन गर्ने तथा कानुनविपरीतका गतिविधि नियन्त्रण गर्ने जिम्मेवारी प्रहरी प्रशासनको हो । यस्तो अवस्थामा प्रहरी नेतृत्वको कार्यशैलीबारे राजनीतिक दलका प्रतिनिधिले प्रश्न उठाएपछि त्यसको तथ्यपरक सम्बोधन र आवश्यक छानबिनको विषय महत्त्वपूर्ण बनेको छ ।

आरोपमाथि निष्पक्ष छानबिन आवश्यक

यद्यपि, एसपी खड्कामाथि रास्वपा नेता यादवले लगाएका आरोपको स्वतन्त्र पुष्टि हुन बाँकी छ ।

आरोपकै आधारमा कसैलाई दोषी ठहर गर्न नमिल्ने भएकाले यस विषयमा सम्बन्धित निकायले प्रमाणका आधारमा निष्पक्ष छानबिन गर्नु आवश्यक देखिन्छ ।

यस प्रकरणमा एसपी खड्का तथा जिल्ला प्रहरी कार्यालय धनुषाको आधिकारिक प्रतिक्रिया प्राप्त हुन सकेको छैन । सम्बन्धित प्रहरी अधिकारीको प्रतिक्रिया र छानबिनबाट प्राप्त तथ्य सार्वजनिक भएपछि आरोपको वास्तविकता स्पष्ट हुने अपेक्षा गरिएको छ ।